2012-10-28

ཁང་ཆུང་དཀར་པོ།

ལྗང་མདོག་རི་ལམ་དེ་ནས་ཡར་ཕེབས་ན།།
ཀྱག་ཀྱོག་ལམ་བུ་དེ་ཡི་མཐའ་སྣེ་ན།།
སྨུག་ཞག་འཁྲིག་པའི་ལྡུམ་ར་གྲུ་བཞིའི་ནང་།།
གཡང་ཞག་འཁྱིལ་བའི་ཁང་ཆུང་དཀར་པོ་མཆིས།། 



ཡར་ལ་ཕེབས་ཤོག་ལྷད་མེད་ཁ་བཏགས་ཡོད།།
མར་ལ་བཞུགས་དང་འབོལ་གདན་ཁྲ་ཁྲ་ཡོད།།
ཕྱོགས་བཞིར་གཟིགས་དང་སེམས་ཀྱི་རི་མོ་ཡོད།།
ལེགས་པར་གསན་དང་སྙན་པའི་རོལ་མོ་ཡོད།།

ཁྱེད་རང་རྒྱང་རིང་ཞིག་ནས་ཕེབས་པ་འདྲ།

ང་ཡང་ཐག་རིང་བོད་ནས་ཡོང་པ་ཡིན།།
ཕན་ཚུན་རྒྱུས་མངའ་ཆུང་ཡང་གཅིག་པ་རེད།།
འདི་རུ་བཞུགས་ནས་ངལ་གསོ་ཅུང་ཙམ་མཛོད།།