2012-11-16

སྐར་མ་རབ་རིབ།


མིག་གི་ཟུར་དེ་གསལ་ཡང་རྒྱང་ཐག་རིང་།།
ལུས་ཀྱི་དྲི་དེ་འཐུལ་ཡང་རེག་ཐབས་བྲལ།།
འཛུམ་གྱི་ཁ་ནས་ཁོག་གི་གཏིང་མ་མཐོང་།།
ང་ཡི་ཤེས་རབ་མིག་ཟུང་ལོང་བར་གྱུར།།

སྐར་མདའ་འཁྱུག་པའི་འཛུམ་མདངས་ཡུད་ཙམ་དེས།
སྤྲིན་ནག་འཁྲིག་པའི་མཐའ་ཞིག་ཡོང་བ་མཚོན།།
སྐྲ་ལོའི་འདབ་མས་མིག་ཟུང་སྒྲིབ་བཞིན་དུ།།
ཁྱེད་ལ་ཅེར་ཚེ་ཁྱེད་རང་རབ་རིབ་རེད།།

སྙིང་གི་བརྩེ་བ་རླུང་ཁྲོད་མར་མེ་སྟེ།།
ཇི་ཙམ་བསྲུངས་ཀྱང་ཉེན་ཁའི་གྲི་དངོར་མཆིས།།
ཆང་ཞིག་འཐུང་བཞིན་གློག་བརྙན་བལྟས་ན་ཡང་།།
མཐོང་ཞིང་ཐོས་པ་ཕྱི་ཡི་རླུང་འཚུབ་ཙམ།།