ངག་སྐུད།

མཐུད་མཚམས་མེད་པའི་སྐུད་པ་དེས།།
ཁྱེད་དང་ང་རང་སྦྲེལ་ཡོད་ན།།
སྣག་ཚ་མེད་པའི་སྨྱུ་གུ་ཟུང་།།
ལྷན་དུ་གཙང་པོར་བསྐྱུར་བར་བྱ།།

ཁྱེད་ཀྱིས་ཁོ་བོ་ག་ལ་མཁྱེན།།
ངས་ཀྱང་ཁྱེད་རང་ཤེས་ཀྱི་མེད།།
ཁྱེད་རང་སྙན་ངག་མཁན་རེད་ཟེར།།
ང་རང་སྙན་ངག་པ་རུ་རློམ།།

འགྲམ་ཆང་།

སྤྲིན་བཞིན་རྒྱུ་བའི་རླངས་པ་དེ་ཡི་འོག །
མཆུ་སྒྲོས་འཛུམ་པའི་འོད་ཀྱིས་ཁྱབ་པ་ཡི།།
ཞལ་ཟས་ཆང་གི་རོ་ཡིས་སྙེམས་པ་དེ།།
སྙིང་ཁ་འགུལ་བའི་རོལ་དབྱངས་བཞིན་དུ་མཚར།།

ཁང་ཆུང་དཀར་པོའི་སྒོ་ཆུང་དེ་ག་ནས།།
ཁྱེད་ཀྱི་རྒྱབ་གཟུགས་དེ་ལ་རྣམ་པར་འཁྲེན།།
རང་བཞིན་གཤིས་ཀྱིས་ཉེ་བའི་ཁྱེད་དང་ང་།།
ཧ་ཅང་ཉེ་ཡང་ཧ་ཅང་ཧ་ཅང་རིང་།།

གཞན་དང་མི་གཅིག་གཤིས་ཀའི་ཚེར་མ་འདིས།།
ང་རང་མེ་ཏོག་ལྡུམ་རར་ཚུད་མི་སྲིད།།
ལག་པ་བསྲིངས་སའི་རི་དེ་འགྱུར་བ་ནས།།
རི་སྐྱེས་ང་རང་རི་བོ་གང་ལ་འཁེན།།