2013-07-23

དར་དཀར་སྔོན་གྱི་དམ་ཚིག

པི་ཝང་རྟ་མགོས་དྲངས་པའི་དབྱངས་ཀྱི་རྟས།།
བོད་སོག་མཉམ་སྦྲེལ་ལོ་རྒྱུས་མཁའ་ནས་དྲངས།།
རྒྱལ་བསྟན་ལ་རྒྱ་མཐུན་པའི་དྲི་བསུངས་དེ།།
ལུག་ཤའི་མོག་མོག་བཞིན་དུ་སྙིང་ཁར་ཞིམ།།

རྩྭ་ཐང་ཕྱེད་དང་བྱེ་ཐང་ཕྱེད་ཅན་གྱི།།
ལ་རྒྱབ་དེ་ནས་ཀི་སྒྲ་འུར་འུར་ངང་།།
རྟ་དམག་བྱེ་བས་སུམ་གཉིས་ས་ཡི་ཁྱོན།།
རྨིག་པས་བཟུང་བའི་དཔའ་སྐད་ང་ཡིས་ཚོར།།

ཤ་ཆང་མར་གྱི་རོ་ཡིས་མ་ཚིམ་པར།།
ཅི་ཞིག་འཚོལ་བའི་སྙིང་དེ་རི་སྤྱང་བཞིན།།
རྒོད་མའི་ཆང་གིས་རབ་མྱོས་སྙིང་ཆེན་དེ།།
སུ་ཞིག་སྒུག་པ་དགུན་གྱི་རྩྭ་ཐང་བཞིན།།